ရန်ကုန်၊ စက်တင်ဘာ ၁၅ ရက်

နိုင်ငံတော်စီမံအုပ်ချုပ်ရေးကောင်စီဝင်၊ ဒုတိယဝန်ကြီးချုပ်နှင့် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီးမြထွန်းဦး ခေါင်းဆောင်သော မြန်မာကိုယ်စားလှယ်အဖွဲ့သည် ရုရှား ဖက်ဒရေးရှင်းနိုင်ငံ၊ ဗလာဒီဗော့စတော့ခ်မြို့၌ ၂၀၂၃ ခုနှစ်၊ စက်တင်ဘာလ ၁၀ ရက်မှ ၁၃ ရက်နေ့အထိ ကျင်းပ ပြုလုပ်သည့် အဋ္ဌမအကြိမ်မြောက် အရှေ့ဖျားစီးပွားရေးဖိုရမ် (8th Eastern Economic Forum) တက်ရောက်ရာမှ စက်တင်ဘာလ ၁၅ ရက်နေ့တွင် မြန်မာနိုင်ငံသို့ ပြန်လည်ရောက်ရှိရာ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်း၊ ရန်ကုန်တိုင်းစစ်ဌာနချုပ် တိုင်းမှူး ဗိုလ်ချုပ်ဇော်ဟိန်း၊  မြန်မာနိုင်ငံဆိုင်ရာ ရုရှားဖက်ဒရေးရှင်းနိုင်ငံသံရုံးမှ တာဝန်ရှိသူများ၊ ဝန်ကြီးဌာနမှ ဒုတိယဝန်ကြီးနှင့် တာဝန်ရှိသူများက ရန်ကုန်အပြည်ပြည်ဆိုင်ရာလေဆိပ်၌ ကြိုဆိုနှုတ်ဆက်ခဲ့ပါသည်။

အရှေ့ဖျားစီးပွားရေးဖိုရမ်ကို ၂၀၁၅ ခုနှစ်မှစ၍ နှစ်စဉ်ကျင်းပခဲ့ပြီး ရုရှားဖက်ဒရေးရှင်း နိုင်ငံနှင့် ရင်းနှီးမြှုပ်နှံမှုအဖွဲ့အစည်းများအကြား ဆက်သွယ်မှု ထူထောင်ရန်နှင့် မြှင့်တင်ရန်၊ ရုရှားအရှေ့ဖျားဒေသ၏ စီးပွားရေးအလားအလာများ၊ ရင်းနှီးမြှုပ်နှံမှု အခွင့်အလမ်းများနှင့် အထူးစီးပွားရေးဇုန်များရှိ စီးပွားရေးအခြေအနေများကို သုံးသပ်ဆွေးနွေးရန် ရည်ရွယ် ကျင်းပခြင်းဖြစ်သည်။

ဒုတိယဝန်ကြီးချုပ်နှင့် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီး မြထွန်းဦး နှင့်အတူ ရင်းနှီးမြှုပ်နှံမှုနှင့် နိုင်ငံခြား စီးပွားဆက်သွယ်ရေး ဝန်ကြီးဌာန၊ စက်မှုဝန်ကြီးဌာန၊ ဟိုတယ်နှင့် ခရီးသွားလာရေးဝန်ကြီးဌာနတို့မှ ပြည်ထောင်စုဝန်ကြီးများ၊ မြန်မာနိုင်ငံတော်ဗဟိုဘဏ် ဥက္ကဋ္ဌ၊ ပြည်ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်မှ အထွေထွေအတွင်းရေးမှူးချုပ်နှင့် ဝန်ကြီးဌာနများမှ အဆင့်မြင့် အရာထမ်းများ ပါဝင် တက်ရောက်ခဲ့ကြသည်။

ဖိုရမ်တက်ရောက်စဉ်ကာလအတွင်း ဒုတိယဝန်ကြီးချုပ်အနေဖြင့် စက်တင်ဘာ ၁၁ ရက် နေ့တွင် The Logistics of Change အစီအစဉ်တွင် ပါရှိသည့်  New Logistics in the Far East: The "White Swan" of the Russian Economy ခေါင်းစဉ်အားလည်းကောင်း၊ နေ့လယ်ပိုင်းတွင် ‘Eurasian Agroexpress’: New Opportunities for Trade in the Asia-Pacific Region ခေါင်းစဉ်အား လည်းကောင်း၊ စက်တင်ဘာလ ၁၂ ရက်နေ့ နေ့လယ်ပိုင်းတွင် Rail Logistics in a New Age: Realities, Challenges, and Opportunities ခေါင်းစဉ်အား လည်းကောင်း Panelist အနေဖြင့် တက်ရောက် ဆွေးနွေး ခဲ့သည်။

စက်တင်ဘာလ ၁၁ ရက်နေ့ နံနက်ပိုင်းတွင် ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာကံဇော်မှ Russia-ASEAN Business Dialogue ခေါင်းစဉ်အား လည်းကောင်း၊ နေ့လယ်ပိုင်းတွင် International Cooperation in a Changed World အစီအစဉ်တွင် ပါရှိသည့် SCO and EAEU Climate Agenda: Moving Towards Common Goals ခေါင်းစဉ် နှင့် Greater Eurasia: Drivers for the Formation of an Alternative International Monetary and Financial System ခေါင်းစဉ်တို့အား လည်းကောင်း၊ စက်တင်ဘာလ ၁၀ ရက်နေ့ နံနက်ပိုင်းတွင် စက်မှုဝန်ကြီးဌာန  ပြည်ထောင်စုဝန်ကြီး ဒေါက်တာချာလီသန်းမှ Program of the International Scientific and Practical Conference အစီအစဉ်တွင် ပါရှိသည့် Colonialism in the East and Its Impact on Modern World ခေါင်းစဉ်အားလည်းကောင်း၊ စက်တင်ဘာလ ၁၁ ရက်နေ့ နေ့လယ်ပိုင်းတွင် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး ဒေါက်တာ ဒေါ်သက်သက်ခိုင်မှ The Far East over the Past Decade: What has been a Success and What Remains to be Done? အစီအစဉ်တွင် ပါရှိသည့် Inbound Tourism: Challenges and Opportunities in a New Reality ခေါင်းစဉ်အား လည်းကောင်း Panelist များ အနေဖြင့် တက်ရောက် ဆွေးနွေးခဲ့ကြသည်။

ဖိုရမ်တက်ရောက်စဉ်ကာလအတွင်း မြန်မာကိုယ်စားလှယ်အဖွဲ့သည် စက်တင်ဘာလ ၁၀ ရက်နေ့၊ နေလယ်ပိုင်းတွင် ရုရှားသမ္မတ၏ အကြံပေး၊ ရုရှားရော့စ်ကွန်ဂရက် ရင်းနှီးမြှုပ်နှံမှု ရန်ပုံငွေ ဥက္ကဋ္ဌ မစ္စတာ အန်တွန် ကိုဗျာကော့ဗ် (Mr. Anton Kobyakov) ခေါင်းဆောင်သော ကိုယ်စားလှယ်အဖွဲ့နှင့် တွေ့ဆုံခဲ့ပြီး ရော့စ်ကွန်ဂရက် ရင်းနှီးမြှုပ်နှံမှု ရန်ပုံငွေအဖွဲ့က မြန်မာနိုင်ငံနှင့် ပူးပေါင်း ဆောင်ရွက်လျက်ရှိသော လုပ်ငန်းများ၏ ဖြစ်ပေါ်တိုးတက်မှု အခြေအနေများနှင့် ရှေ့ဆက်လက်ဆောင်ရွက်မည့် ကိစ္စရပ်များနှင့် စပ်လျဉ်း၍ ရင်းနှီးပွင့်လင်းစွာ ဆွေးနွေးခဲ့ကြသည်။

စက်တင်ဘာလ ၁၂ ရက်နေ့၊ နံနက်ပိုင်းတွင် ရုရှားဖက်ဒရေးရှင်းနိုင်ငံ၊ စီးပွားရေးဖွံ့ဖြိုး တိုးတက်မှုဝန်ကြီး မစ္စတာ မာ့ခ်ဆင် ရီရှတ်နီကို့ဗ် (Mr. Maxim Reshetnikov) ခေါင်းဆောင်သော အဖွဲ့ နှင့် တွေ့ဆုံခဲ့ပြီး စတုတ္ထအကြိမ် ရုရှား-မြန်မာ အစိုးရအချင်းချင်း ကုန်သွယ်ရေးနှင့် စီးပွားရေးပူးပေါင်းဆောင်ရွက်မှု ကော်မရှင် အစည်းအဝေးကျင်းပရေး၊ မြန်မာ-ရုရှားစီးပွားရေး ပူးပေါင်း ဆောင်ရွက်မှုဆိုင်ရာ ဖြစ်ပေါ်တိုးတက်မှုအခြေအနေများနှင့် နှစ်နိုင်ငံ ပူးပေါင်း ဆောင်ရွက်မှုဆိုင်ရာ လမ်းပြမြေပုံ အကောင်အထည်ဖော် ဆောင်ရွက်မှု အခြေအနေများနှင့် စပ်လျဉ်း၍ အပြန်အလှန် ရင်းနှီး ပွင့်လင်းစွာ အမြင်ချင်းဖလှယ် ဆွေးနွေးခဲ့ကြသည်။

ဆက်လက်၍ JSC Russian Railways မှ First Deputy CEO Mr. Sergey Pavlov ခေါင်းဆောင်သည့် အဖွဲ့ နှင့် တွေ့ဆုံ၍ နှစ်နိုင်ငံ ရထားလမ်းတည်ဆောက်ရေးကိစ္စရပ်များတွင် ပူးပေါင်းဆောင်ရွက်ရေး၊ မြန်မာနိုင်ငံရှိ စက်ခေါင်းနှင့် လူစီးတွဲစက်ရုံများတွင် စီမံကိန်း လုပ်ငန်းအသစ်များ ပူးပေါင်း ဆောင်ရွက်နိုင်ရေး၊ ရုရှားနိုင်ငံ တက္ကသိုလ်များအနေဖြင့် ရထား ပညာတော်သင်များ ဆောင်ရွက်ပေးနိုင်ရေး၊ မြန်မာနိုင်ငံ၏ ရထားလုပ်ငန်းများ အတွက် နည်းပညာနှင့် ငွေကြေးအထောက်အပံ့များ ရရှိနိုင်ရေးနှင့် ကုန်းတွင်းဆိပ်များတည်ဆောက်ရေး လုပ်ငန်းများတွင် လာရောက်ရင်းနှီးမြှုပ်နှံရေး ကိစ္စရပ်များကို ဆွေးနွေးခဲ့ကြသည်။

မွန်းလွဲပိုင်းတွင် ရုရှား-အာဆီယံ စီးပွားရေးကောင်စီဥက္ကဋ္ဌ မစ္စတာ အီဗန် ဗီတိုရိုဗစ်ရှ် ပိုလီရာကော့ဗ် (Mr. Ivan Viktorovich Polyakov) ခေါင်းဆောင်သော အဖွဲ့နှင့် တွေ့ဆုံ ဆွေးနွေး၍ ရုရှားနိုင်ငံနှင့် အာဆီယံနိုင်ငံများအကြား ဆောင်ရွက်လျက်ရှိသည့် စီးပွားရေး ပူးပေါင်းဆောင်ရွက်မှုများ၊ ရုရှားနှင့် မြန်မာနိုင်ငံတို့အကြား ကုန်သွယ်ရေးနှင့် ရင်းနှီးမြှုပ်နှံမှု မြှင့်တင်ရေးနှင့် စီးပွားရေး ပူးပေါင်းဆောင်ရွက်မှုဆိုင်ရာကိစ္စရပ်များအား ရင်းနှီးပွင့်လင်းစွာ ဆွေးနွေးခဲ့ကြသည်။

ထို့ပြင် ဒုတိယဝန်ကြီးချုပ်နှင့် ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီးမြထွန်းဦး ခေါင်းဆောင်သော မြန်မာကိုယ်စားလှယ်အဖွဲ့သည် စက်တင်ဘာလ ၁၂ ရက်နေ့၊ ညနေပိုင်း အဋ္ဌမအကြိမ်မြောက် အရှေ့ဖျားစီးပွားရေး ဖိုရမ်၏ ပင်မအခမ်းအနားဖြစ်သည့် မျက်နှာစုံညီအစည်းအဝေး (Main Forum- Plenary Session) သို့ ပါဝင် တက်ရောက်ခဲ့သည်။ အဆိုပါ အစည်းအဝေးတွင် ရုရှားဖက်ဒရေးရှင်းနိုင်ငံ သမ္မတ မစ္စတာ ဗလာဒီမာပူတင်မှ မိန့်ခွန်းပြောကြားပြီး လာအိုပြည်သူ့သမ္မတနိုင်ငံ၊ ဒုတိယသမ္မတက ဆွေးနွေးဘက် နိုင်ငံအနေဖြင့် တက်ရောက် ဆွေးနွေးခဲ့သည်။

ဖိုရမ်ကျင်းပစဉ် ကာလအတွင်း ရုရှားနိုင်ငံ၏ ဒေသဆိုင်ရာ အကြီးအကဲများနှင့် တွေ့ဆုံမှု အနေဖြင့် စက်တင်ဘာလ ၁၂ ရက် ညနေပိုင်းတွင် ရုရှားဖက်ဒရေးရှင်းနိုင်ငံ အလယ်ပိုင်းရှိ အီကွတ်မြို့၏ Governor ခေါင်းဆောင်သော အဖွဲ့နှင့် တွေ့ဆုံ၍ နှစ်နိုင်ငံအကြား ဒေသအလိုက် ဖွံ့ဖြိုးတိုးတက်ရေး၊ ခရီးသွားလာမှု လုပ်ငန်းများနှင့် စီးပွားရေးဖွံ့ဖြိုးမှုအတွက် ပူးပေါင်း ဆောင်ရွက်နိုင်မည့် ကိစ္စရပ်များကို လည်းကောင်း၊ စက်တင်ဘာလ ၁၃ ရက် နေ့လယ်ပိုင်းတွင် ရုရှား ဖက်ဒရေးရှင်းနိုင်ငံ၊ ပရီမော့စကီးဒေသ၏ Governor ခေါင်းဆောင်သော အဖွဲ့နှင့် တွေ့ဆုံ၍ နှစ်နိုင်ငံအကြား ရေကြောင်းဆိုင်ရာ ကုန်သွယ်မှု ဖြစ်နိုင်ခြေ၊ နှစ်နိုင်ငံ ခရီးသွားလုပ်ငန်း တိုးတက်ဖွံ့ဖြိုးရေး ပူးပေါင်း ဆောင်ရွက် နိုင်မည့် ကိစ္စရပ်များကို လည်းကောင်း ဆွေးနွေးခဲ့ကြသည်။

မြန်မာကိုယ်စားလှယ်အဖွဲ့သည် နည်းပညာဆိုင်ရာ ကုမ္ပဏီများ၊ အဖွဲ့အစည်းများ နှင့်လည်း သီးခြား တွေဆုံဆွေးနွေးမှုများ ဆောင်ရွက်ခဲ့ရာ စက်တင်ဘာလ ၁၀ ရက်နေ့ နံနက်ပိုင်းတွင် Aquarius နည်းပညာကုမ္ပဏီမှ တာဝန်ရှိသူများအား လက်ခံတွေ့ဆုံရာတွင် မြန်မာနိုင်ငံ၏ ဒီဂျစ်တယ် အသွင်ကူးပြောင်းရေး၊ ဒီဂျစ်တယ် စီးပွားရေး၊ ဆိုက်ဘာလုံခြုံရေး နှင့် သတင်းအချက်အလက် နည်းပညာကဏ္ဍများတွင် ပူးပေါင်းဆောင်ရွက်နိုင်ရေးနှင့် ရင်းနှီးမြှုပ်နှံနိုင်မည့် အခွင့်အလမ်းများ၊ Aquarius နည်းပညာကုမ္ပဏီ၏ ထုတ်ကုန်များအား ပိုမိုနားလည်စေရန် စီးပွားရေးလုပ်ငန်းများ အချင်းချင်း တွေ့ဆုံဆွေးနွေးမှုများ ဆောင်ရွက်ရန် ကိစ္စရပ်များကို လည်းကောင်း၊ စက်တင်ဘာလ ၁၃ ရက်နေ့ နံနက်ပိုင်းတွင် Far Eastern Federal University မှ တာဝန်ရှိသူများအား လက်ခံတွေ့ဆုံရာတွင် မြန်မာနိုင်ငံ၊ ကျန်းမာရေးဝန်ကြီးဌာနနှင့် Far Eastern Federal University (FEFU) တို့အကြား လက်မှတ်ရေးထိုးထားသည့် ဆေးဘက်ဆိုင်ရာပညာရပ် ပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ အကောင်အထည်ဖော် ဆောင်ရွက်ရေး၊ နှစ်နိုင်ငံတက္ကသိုလ်များအကြား ပူးပေါင်းဆောင်ရွက်မှုများ စတင်ရေးနှင့် နေပြည်တော်တွင် FEFU ရုံးခွဲ ဖွင့်လှစ်မည့် ကိစ္စရပ်များနှင့် စပ်လျဉ်း၍ လည်းကောင်း ဆွေးနွေးခဲ့ကြသည်။

ညနေပိုင်းတွင် ဒုတိယဝန်ကြီးချုပ်နှင့် ပို့ဆောင်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီး ခေါင်းဆောင်သော မြန်မာကိုယ်စားလှယ်အဖွဲ့သည့် ဗလာဒီ ဗော့ စတော့ခ် အပြည်ပြည်ဆိုင်ရာဆိပ်ကမ်း Commercial Port of Vladivostok သို့ သွားရောက်ပြီး ဆိပ်ကမ်း၏ စွမ်းဆောင်မှုများ၊ ဆိပ်ကမ်း စီမံခန့်ခွဲမှု စနစ်အား အဆင့်မြင့် ကွန်ပျူတာစနစ် အသုံးပြုပြီး စီမံခန့်ခွဲနေမှုများနှင့် အနာဂတ် ဆိပ်ကမ်း ဆက်လက် တည်ဆောက်သွားမည့် အစီအမံများကို လေ့လာခဲ့ကြသည်။

ယခု ခရီးစဉ်အတွင်း နှစ်နိုင်ငံ သဘောတူစာချုပ်များ၊ နားလည်မှု စာချွန်လွှာများ လက်မှတ်ရေးထိုးမှု အနေဖြင့် ရုရှား-မြန်မာ နှစ်နိုင်ငံအကြား ရင်းနှီးမြှုပ်နှံမှုများ ပိုမိုအဆင်ပြေ စေရန်နှင့် ငွေပေးချေမှုများ အဆင်ပြေချောမွေ့စေရန်အတွက် ရုရှားဘဏ်များမှ မြန်မာနိုင်ငံ၌ ဘဏ်ခွဲ (သို့မဟုတ်) ကိုယ်စားလှယ်ရုံးခွဲများ လာရောက်ဖွင့်လှစ်နိုင်ရန် ရည်ရွယ်ချက်ဖြင့် ရုရှားနိုင်ငံ ဗဟိုဘဏ်နှင့် မြန်မာနိုင်ငံ‌တော်ဗဟိုဘဏ်တို့အကြား ဘဏ်စာရင်းဖွင့်လှစ်သည့် သဘောတူ စာချုပ်အား မြန်မာနိုင်ငံတော်ဗဟိုဘဏ် ဥက္ကဋ္ဌနှင့် ရုရှားနိုင်ငံဗဟိုဘဏ် ဒုတိယ ဥက္ကဋ္ဌတို့က လည်းကောင်း၊ နှစ်နိုင်ငံခရီးသွားဧည့်သည် ဝင်ရောက်မှုများ တိုးမြင့်လာစေရေး၊ ခရီးသွားလုပ်ငန်း ဝန်ဆောင်မှု အရည်အသွေးများ မြှင့်တင်ရေး၊ ခရီးသွားလုပ်ငန်း အလားအလာများ တိုးမြင့်လာစေရေးနှင့် ခရီးသွားလုပ်ငန်းတွင်  ပူးပေါင်းဆောင်ရွက်မှုများ ပိုမို ခိုင်မာစေရေးတို့ကို ရည်ရွယ်၍ ခရီးသွားလုပ်ငန်းပူးပေါင်း ဆောင်ရွက်မှုဆိုင်ရာ နားလည်မှုစာချွန်လွှာအား ဟိုတယ်နှင့် ခရီးသွားလာရေးဝန်ကြီးဌာန၊ ပြည်ထောင်စုဝန်ကြီးနှင့် ရုရှားဖက်ဒရေးရှင်းနိုင်ငံ၊ စီးပွားရေး ဖွံ့ဖြိုးတိုးတက်မှု ဝန်ကြီးဌာန၊ ဝန်ကြီး တို့ကလည်းကောင်း  လက်မှတ်ရေးထိုး ခဲ့ကြကြောင်း သတင်းရရှိသည်။