ရန်ကုန်၊ အောက်တိုဘာ (၁၁)

    ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦးသန့်စင်မောင်၊ လေကြောင်းပို့ဆောင်ရေးညွှန်ကြားမှုဦးစီးဌာန၊ ညွှန်ကြားရေးမှူးချုပ် ဦးမင်းလွင်၊ မြန်မာ အမျိုးသားလေကြောင်း၊ အမှုဆောင်အရာရှိချုပ် ဦးသန်းထွန်း၊ ဌာနဆိုင်ရာအကြီးအကဲများ နှင့် လေကြောင်းလိုင်းများမှ တာဝန်ရှိသူများသည် အောက်တိုဘာလ (၉) ရက်၊ မွန်းလွဲ (၂)နာရီက ရန်ကုန်အပြည်ပြည်ဆိုင်ရာလေဆိပ်တွင် ဘရာဇီးလ်နိုင်ငံ၊ EMBRAER ကုမ္ပဏီမှ ထုတ်လုပ်သော မျိုးဆက်သစ် EMBRAER E-190 E2 လေယာဉ်ပြသရှင်းလင်းပွဲသို့ တက်ရောက် ခဲ့ကြသည်။

    ပြည်ထောင်စုဝန်ကြီးနှင့်အဖွဲ့သည် အဆိုပါလေယာဉ်ပေါ်သို့ တက်ရောက်လှည့်လည် ကြည့်ရှုခဲ့ကြပြီး လေယာဉ်ကုမ္ပဏီမှ တာဝန်ရှိသူများနှင့်အတူ မှတ်တမ်းတင်ဓာတ်ပုံ ရိုက်ကူးခဲ့ကြသည်။ အဆိုပါ EMBRAER ကုမ္ပဏီမှ ထုတ်လုပ်သော မျိုးဆက်သစ် EMBRAER လေယာဉ်များကို မြန်မာနိုင်ငံအပါအဝင် နိုင်ငံပေါင်း (၆၀)ရှိ လေကြောင်းလိုင်း (၁၁၁)လိုင်းမှ စီးရေ (၁၇၀၀)ခန့် အသုံးပြုလျက်ရှိပါသည်။ ယခုလာရောက်ပြသသော EMBRAER E-190 E2 လေယာဉ်သည် လေယာဉ်ဒီဇိုင်းမှအစ အဖက်ဖက်မှ ပြုပြင် ပြောင်းလဲကာ မျိုးဆက်သစ်အဖြစ် ယခု ၂၀၁၈ ခုနှစ်တွင် ဈေးကွက်အတွင်း စတင်ဖြန့်ဖြူးလာသော လေယာဉ် အမျိုးအစားသစ်ဖြစ်သည်။