နေပြည်တော်၊ ဇန်နဝါရီ ၁၀
၂၀၂၆ ခုနှစ် (၇၉) နှစ်မြောက် ပြည်ထောင်စုနေ့အခမ်းအနားကျင်းပရေးအတွက် ပို့ဆောင်ရေးနှင့်ဆက်သွယ်ရေးဆပ်ကော်မတီ၏ ပထမအကြိမ် လုပ်ငန်းညှိနှိုင်းအစည်းအဝေးကို ယနေ့မွန်းလွဲပိုင်းတွင် ပို့ဆောင်ရေးနှင့်ဆက်သွယ်ရေးဝန်ကြီးဌာန၊ အစည်းအဝေးခန်းမ၌ ကျင်းပသည်။
ဦးစွာ ပို့ဆောင်ရေးနှင့်ဆက်သွယ်ရေးဆပ်ကော်မတီ ဥက္ကဋ္ဌ၊ ပို့ဆောင်ရေးနှင့်ဆက်သွယ်ရေးဝန်ကြီးဌာန ဒုတိယဝန်ကြီး ဦးအောင်ကျော်ထွန်းက ယခုကျင်းပမည့် ပြည်ထောင်စုနေ့အခမ်းအနားသည် နိုင်ငံတော်အဆင့်အခမ်းအနားဖြစ်တဲ့အတွက် ဆပ်ကော်မတီဝင်များအနေဖြင့် မိမိတို့လုပ်ငန်းတာဝန်များကို အလေးအနက်ထား ဆောင်ရွက်ကြရမည်ဖြစ်ကြောင်း၊ ပြည်ထောင်စုနေ့အခမ်းအနားသို့ တက်ရောက်လာကြမည့် ကိုယ်စားလှယ်များ၊ တိုင်းဒေသကြီး/ ပြည်နယ်အသီးသီးမှ ယဉ်ကျေးမှုအဖွဲ့များအား အချိန်မီ ဘေးအန္တရာယ်ကင်းရှင်းစွာ ပို့ဆောင်ရမည့်ကိစ္စသည် မိမိတို့ဆပ်ကော်မတီ၏ အဓိကလုပ်ငန်းတာဝန်ဖြစ်ပါကြောင်း၊ ဒါ့အပြင် ပို့ဆောင်ရေးနှင့်ဆက်သွယ်ရေးကိစ္စများကို လစ်ဟာမှုမရှိ စနစ်တကျဖြစ်စေရေး ဆောင်ရွက်ကြရန်လိုကြောင်း၊ ဧည့်သည်တော်များနှင့် ယဉ်ကျေးမှုအဖွဲ့များအား သတ်မှတ်နေရာများသို့ အချိန်မီပို့ဆောင်ပေးရမည်ဖြစ်ကြောင်း၊ ယာဉ်တန်းများ ကြိုတင်ဆက်တိုက် လေ့ကျင့်မှုကိုလည်း သတ်မှတ်ရက်များအတိုင်း ဆောင်ရွက်ရမည်ဖြစ်ကြောင်း၊ သယ်ယူပို့ဆောင်မည့် ယာဉ်များ၏ကြံ့ခိုင်ရေး၊ သန့်ရှင်းသပ်ရပ်မှုရှိစေရေး၊ မီးဘေးအန္တရာယ် ကြိုတင်ကာကွယ်ရေးနှင့် ယာဉ်တန်းလုံခြုံရေးတို့ကိုလည်း အထူးအလေးထား ဆောင်ရွက်သွားကြရန်လိုအပ်ပါကြောင်း၊ အဆင့်ဆင့်သော တာဝန်ကျဝန်ထမ်းများအနေဖြင့် လုံခြုံရေးအသိ၊ လုံခြုံရေးသတိ ရှိရန်လိုသလို ကျန်းမာရေးနှင့်ပတ်သက်၍ အထူးဂရုပြုစားသောက် နေထိုင်ကြရန်လိုကြောင်း ပြောကြားပါသည်။
ထို့နောက် အစည်းအဝေးတက်ရောက်လာကြသည့် ဆပ်ကော်မတီဝင်များနှင့် အထူးဖိတ်ကြားထားသည့် ဆက်စပ် ဆပ်ကော်မတီ တာဝန်ရှိသူများက သက်ဆိုင်ရာကဏ္ဍများအလိုက် ဆွေးနွေးတင်ပြကြရာ ဒုတိယဝန်ကြီးက လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိသည်။
ပို့ဆောင်ရေးနှင့်ဆက်သွယ်ရေးဝန်ကြီးဌာန