ပို့ဆောင်ရေးနှင့်ဆက်သွယ်ရေးဝန်ကြီးဌာန၊ မြန်မာ့ဆိပ်ကမ်းအာဏာပိုင်မှ ဗော်ယာ မ/ချ ရေယာဉ် “ဆင်ပြောင်”သည် မာန်အောင်ကျွန်း မီးပြတိုက်နှင့် တစ်မိုင်ခွဲအကွာ ပင်လယ်ပြင်တွင် ကျောက်ချ အခြေပြုစဉ် ၁၁-၂-၂၀၁၉ ရက်နေ့၊ နံနက်(၀၄:၃၀) အချိန်ခန့်၌ နစ်မြုပ်သွားခဲ့မှုဖြစ်စဉ်နှင့် စပ်လျဉ်း၍ စုံစမ်းစစ်ဆေးရေးအဖွဲ့ကို ၁၁-၂-၂၀၁၉ ရက်နေ့တွင် အောက်ပါအတိုင်း ဖွဲ့စည်းခဲ့ပါသည်-

စုံစမ်းစစ်ဆေးရေးအဖွဲ့ ဥက္ကဋ္ဌ အပါအဝင် အဖွဲ့ဝင်(၅)ဦး တို့သည် တပ်မတော်(ရေ) ထောက်ပံ့ရေးရေယာဉ်(၆၁၂)သို့  ၁၆-၂-၂၀၁၉ ရက်နေ့၊ နံနက်ပိုင်းတွင် သွားရောက်ကာ“ဆင်ပြောင်” ရေယာဉ်အမြုပ်အား ရေငုပ်စစ်ဆေးမှု အခြေအနေကို စုံစမ်း မေးမြန်း ကြပါသည်။ ထို့နောက်အဆိုပါအဖွဲ့သည် နံနက် (၁၀:၀၀) အချိန်တွင် ရေငုပ်စစ်ဆေးနေမှုအား သွားရောက် ကြည့်ရှုပါသည်။ ၎င်းနောက် မာန်အောင်ကျွန်း မီးပြတိုက်သို့ (၁၀:၄၅)အချိန်ထွက်ခွာကာ မာန်အောင်ကျွန်းမီးပြတိုက် ပြင်ဆင်ရေးလုပ်ငန်း ဆောင်ရွက် နေသော မီးပြတိုက်ဝန်ထမ်းများအား “ဆင်ပြောင်” ရေယာဉ်နစ်မြုပ်ခဲ့မှု အခြေအနေ စစ်ဆေး မေးမြန်း ခဲ့ပြီး မာန်အောင်ကျွန်းမီးပြတိုက်မှ မာန်အောင်ကျွန်းမကြီးသို့ (၁၁:၅၀)အချိန်ခန့်တွင် ပြန်လည် ထွက်ခွာ သွားခဲ့ပါသည်။

သင်္ဂြိုလ်မှုကိစ္စပြီးစီးသည့် “ဆင်ပြောင်”ရေယာဉ်ဝန်ထမ်းများ၏ မိသားစုများသည် ၁၅.၂.၂၀၁၉ ရက်နေ့နံနက်ပိုင်းတွင် မြန်မာ့ဆိပ်ကမ်းအာဏာပိုင်မှ အရာရှိတစ်ဦး ဦးစီး၍ မာန်အောင်မြို့မှ ပြန်လည် ထွက်ခွာခဲ့ရာ ရန်ကုန်မြို့သို့ ၁၆.၂.၂၀၁၉ ရက်နေ့ နံနက်ပိုင်းတွင် ကောင်းမွန်စွာ ပြန်လည်ရောက်ရှိ ပါသည်။

ကျန်ပျောက်ဆုံးလျက်ရှိသည့် ဝန်ထမ်း(၈)ဦး၏ မိသားစုဝင်များသည်လည်း ၁၆.၂.၂၀၁၉ ရက်နေ့၊ မွန်းလွဲပိုင်းတွင် မြန်မာ့ဆိပ်ကမ်းအာဏာပိုင်မှ ကိုယ်စားလှယ်တစ်ဦး ဦးစီး၍ မာန်အောင် ကျွန်းမှ ရန်ကုန်မြို့သို့ ပြန်လည်ထွက်ခွာခဲ့ပြီး ရန်ကုန်မြို့သို့ ၁၇.၂.၂၀၁၉ ရက်နေ့၊ နံနက်ပိုင်းခန့်တွင် ပြန်လည်ရောက်ရှိမည် ဖြစ်ပါသည်။

ပျောက်ဆုံးလျက်ရှိသည့် ရေယာဉ်ဝန်ထမ်းများအား ရှာဖွေ ကယ်ဆယ်ရေးအတွက် ဒေသခံ အဖွဲအစည်းများ၊ လူမှုအဖွဲ့အစည်းများ၊ တပ်မတော်(ရေ)နှင့် မြန်မာ့ဆိပ်ကမ်းအာဏာပိုင်မှ တာဝန် ရှိသူများဖြင့် ပူးပေါင်းဆောင်ရွက်လျက်ရှိပြီး ၁၆-၂-၂၀၁၉ ရက်နေ့၊ ညနေ(၁၇:၀၀) အချိန်အထိ ပျောက်ဆုံး ဝန်ထမ်း​(၈)ဦးကို ထပ်မံရှာဖွေတွေ့ရှိခြင်း မရှိသေးပါကြောင်း သိရှိရပါသည်။

၁၁-၂-၂၀၁၉  ရက်နေ့တွင် မာန်အောင်ကျွန်းမီးပြအနီး နစ်မြုပ်သွားသော

“ဆင်ပြောင်”ရေယာဉ်မှ

ကယ်ဆယ်ရရှိ / အလောင်းရ / ပျောက်ဆုံး ဝန်ထမ်းစာရင်း

(၁၆-၂-၂၀၁၉ ရက်နေ့ မွန်းလွဲ ၁၇:၀၀ အချိန်အထိ ရရှိစာရင်း)

(၁၄-၂-၂၀၁၉ ရက်နေ့ စာရင်းအတိုင်းသာ)

ကယ်ဆယ်ရရှိ စာရင်း (၇)ဦး

အလောင်းရရှိ စာရင်း (၁၁)ဦး

ပျောက်ဆုံးဆဲစာရင်း (၈)ဦး