ပို့ဆောင်ရေးနှင့်ဆက်သွယ်ရေးဝန်ကြီးဌာန၊ မြန်မာ့ဆိပ်ကမ်းအာဏာပိုင်မှ ဗော်ယာမ/ချ ရေယာဉ် “ဆင်ပြောင်”သည် မာန်အောင်ကျွန်း မီးပြတိုက်နှင့် တစ်မိုင်ခွဲအကွာ ပင်လယ်ပြင်တွင် ကျောက်ချ အခြေပြုစဉ် ၁၁-၂-၂၀၁၉ ရက်နေ့၊ နံနက်(၀၄:၃၀)အချိန်ခန့်၌ နစ်မြုပ်သွားခဲ့မှု ဖြစ်စဉ်၌ ကွယ်လွန်ခဲ့သော ရေယာဉ်ဝန်ထမ်းများအတွက် လူမှုဖူလုံရေး၊ နာရေးစရိတ် အကျိုးခံစားခွင့် (လစာ၏၄ဆ)ကို ၁၉-၂-၂၀၁၉ရက်နေ့၊ ညနေ(၁၅:၀၀)အချိန်၊ ရန်ကုန်မြို့၊ မြန်မာ့ဆိပ်ကမ်းအာဏာပိုင်ခန်းမတွင် အလုပ်သမား၊  လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ လူမှုဖူလုံရေးအဖွဲ့၏ တိုင်းဒေသကြီး ယာယီ တာဝန်ခံအရာရှိ၊ ဦးဝင်းစိုးနှင့် အဖွဲ့က ကွယ်လွန် ရေယာဉ် ဝန်ထမ်းများ၏ မိသားစုဝင်များထံ ပေးအပ်ခဲ့ပါသည်။

ပျောက်ဆုံးလျက်ရှိသည့် ရေယာဉ်ဝန်ထမ်းများကို ရှာဖွေကယ်ဆယ်ရေးအတွက် မြန်မာ့ဆိပ်ကမ်းအာဏာပိုင်မှ ဌာနမှူး (မီးပြတိုက်) ဦးအေးလွင် ဦးစီးသည့် မီးပြတိုက် ဝန်ထမ်းအဖွဲ့(၉)ဦး သည် မာန်အောင်မီးပြကျွန်းကို အခြေပြု၍ တပ်မတော်(ရေ)၊ ဒေသခံအဖွဲ့အစည်းများ၊ လူမှုအဖွဲ့အစည်း များနှင့် ပူးပေါင်းဆောင်ရွက်လျက်ရှိပြီး ၁၉-၂-၂၀၁၉ ရက်နေ့၊ ညနေ(၁၇:၀၀)အချိန်အထိ ပျောက်ဆုံးဝန်ထမ်း​ (၇)ဦး ကို ထပ်မံ ရှာဖွေတွေ့ရှိခြင်း မရှိသေးပါကြောင်း သိရှိရပါသည်။

ထို့ကြောင့် ၁၉.၂.၂၀၁၉ ရက်နေ့အထိ Dead Body(၁၂)ခုတွေ့ရှိထားပြီး ရေယာဉ်ဝန်ထမ်း(၇)ဦး ပျောက်ဆုံးဆဲ ဖြစ်ပါသည်။

၁၁-၂-၂၀၁၉  ရက်နေ့တွင် မာန်အောင်ကျွန်းမီးပြအနီး နစ်မြုပ်သွားသော

“ဆင်ပြောင်”ရေယာဉ်မှ

ကယ်ဆယ်ရရှိ / အလောင်းရ / ပျောက်ဆုံး ဝန်ထမ်းစာရင်း

(၁၉-၂-၂၀၁၉ ရက်နေ့ ညနေ ၁၇:၀၀ အချိန်အထိ ရရှိစာရင်း)

(၁၇-၂-၂၀၁၉ ရက်နေ့ စာရင်းအတိုင်းသာ)

ကယ်ဆယ်ရရှိ စာရင်း (၇)ဦး

အလောင်းရရှိ စာရင်း (၁၂)ဦး

ပျောက်ဆုံးဆဲစာရင်း (၇)ဦး